ప్రపంచంలో ఎప్పుడైనా, ఎక్కడైనా, ఎవరికైనా… వారి జీవనశైలికి సంబంధించి రెండే రెండు దారులుంటాయి.
ఈ రెండు దారుల్లో “నాది ఈ దారి” అన్న ఎంపిక కొంతమంది విషయంలో తెలిసి జరగొచ్చు. కొంతమంది విషయంలో తెలియక జరగొచ్చు. కాని, ఎవరికిష్టమైన దారి వాళ్ళు ఎంచుకుంటారు.
అలా వారు ఎన్నుకున్న ఆ ఒక్క దారే… అతడు లేదా ఆమె “ఎవరు” అన్నది నిర్వచిస్తుంది.
ఇంతకీ ఆ రెండు దారులేంటో ఊహించగలరా?
మొదటి దారి –
మనల్ని మనం చాలా తక్కువగా అంచనా వేసుకొని “ఏదో అలా” అన్నట్టుగా బతుకు వెళ్లదీయటం.
ఎలా జరగాలని ఉంటే అలా జరుగుతుంది అన్నది ఇక్కడి థియరీ.
రెండో దారి –
మనలోని సంపూర్ణ సామర్థ్యాన్ని వినియోగించుకొంటూ, ఎప్పుడూ అనుకున్న పనినే చేస్తూ, అనుకున్న పధ్ధతిలోనే జీవిస్తూ... ఎప్పటికప్పుడు ఎన్నెన్నో ప్రయోగాలు చేస్తూ, జయాపజయాల్ని స్థితప్రజ్ఞతతో స్వీకరిస్తూ, కష్టాల్లోనూ, సుఖాల్లోనూ జీవితాన్ని అనుక్షణం ఆస్వాదించటం.
పనే దేవుడు అన్నది ఇక్కడి థియరీ. అలాగని వీళ్ళు నాస్తికులేం కాదు.
కట్ టూ మొదటి దారి –
మొదటి దారిలో – తమలో ఉన్న సామర్థ్యాన్ని వీళ్ళు ఎప్పుడూ గుర్తించరు. కనీసం వారిలో కూడా ఎదో ఒక ప్రత్యేకత, లేదంటే ఎంతో కొంత ‘విషయం’ ఉందన్న నిజాన్ని గుర్తించడానికి కూడా ఇష్టపడరు. కొత్త నైపుణ్యాలను నేర్చుకొనే ఆలోచనే వీరికి ఇష్టం ఉండదు.
“నాకు రాదు”, “నాకు లేదు”, “ఇలా వుంటే చేసేవాణ్ణి”, “అలాగయితే సాధించేదాణ్ణి”… వంటి నెగెటివ్ థింకింగ్ సాకులన్నీ ఈ దారిలో ప్రతిరోజూ ప్రతి క్షణం పుష్కలంగా దొరుకుతాయి. తక్కువ పనిచేయటం, తక్కువ సంపాదించటం, సంతృప్తి లేకపోయినా ఉన్నామన్న భ్రమలో బ్రతకటం, గీసుకున్న పరిధి దాటి ఏ విషయంలోనూ ఎక్కువగా ప్రయత్నించకపోవడం, వ్యక్తిగత వికాసానికి సంబంధించి గానీ, హాబీగా గానీ ఏమీ చదవకపోవడం, అసలు ఆలోచించకపోవడం… ఇదీ మొదటి దారిని ఎంచుకున్నవాళ్ల బతుకుబాట.
ఆశ్చర్యంగా ప్రతివందమందిలో 99 మంది ఈ బాటనే ఇష్టపడతారు. దీనికి కారణాలు అనేకం. సాకులు పుష్కలం.
వీళ్ళంతా "99% క్లబ్" మెంబర్స్.
కట్ టూ రెండో దారి –
ఈ దారిలో… ప్రతి విషయంలోనూ ఉత్సాహం, ఎప్పుడూ ఏదో ఒకటి చేయాలన్న తపన. “ఇలాగే ఎందుకు చేయాలి.. ఇలాగే ఎందుకుండాలి?” అన్న ప్రశ్న. నిరంతర ఆలోచన. అవతలి వారికి “తలతిక్క”గా కనిపించే తమకు తామే ఏర్పరచుకున్న క్రమశిక్షణ. ఎప్పటికప్పుడు ఏదో ఒక లక్ష్యం ఏర్పర్చుకోవడం, దాన్ని సాధించాలన్న నిరంతర ఆసక్తిలో సజీవంగా ఉండటం. నచ్చిన ప్రతి పుస్తకాన్నీ చదవటం, ప్రతిదాన్నీ నిర్మాణాత్మకంగా ఆలోచించడం… ఇవన్నీ ఈ రెండో దారిని ఎన్నుకున్నవారి సాధారణ లక్షణాలు.
అంతేకాదు... వీళ్ళు ఎప్పుడూ పని రాక్షసుల్లా కాకుండా, కుటుంబంతో, స్నేహితులతో తగినంత సమయం గడుపుతూ, ఆ సమయానికి ఒక గొప్ప విలువని తీసుకురావడం, చిన్నవి పెద్దవి ఎన్నో లక్ష్యాల్ని సాధించడం, బాగా సంపాదించడం, లేదా సంపాదించే ప్రయత్నంలో ముందుకెళ్తుండటం చేస్తారు.
ఇంకా - ఈ రెండోదారి ప్రేమికులంతా వారి మనసులో మెరిసిన ప్రతి ప్రయోగం చేసుకుంటూపోతుంటారు. అది సఫలమైందా, విఫలమైందా అన్నది పట్టించుకోరు. ఆ ప్రాసెస్ను, ఆ జర్నీని ఇష్టపడతారు. కొన్నిసార్లు కోలుకోలేని ఎదురుదెబ్బలు తగుల్తుంటాయి, కాని అదే దారిలో ముందుకెళ్తుంటారు. ఫలితాలు విజయవంతంగా అవే ఫాలో అవుతుంటాయి.
మొత్తానికి ప్రతిక్షణం సంపూర్ణ జీవితాన్ని గడుపుతూ, "వీడేంటి, పిచ్చోడా?" అని అవతలివారికి అనిపించేలా బ్రతకడం… ఇదంతా కూడా ఈ రెండవ దారిని ఎంచుకొన్న వాళ్ల జీవనశైలి. చాలామందికి నచ్చని జీవితం.
కాని, జీవితం ఒక్కటే... అది గాలి బుడగలాంటిది అన్న విషయం వీరికి బాగా తెలుసు.
ప్రతి వందమందిలో ఒక్కరు మాత్రమే ఈ బాటలో ఉంటారు. అంటే వన్ పర్సెంట్ అన్నమాట.
వీళ్ళంతా "1% క్లబ్" మెంబర్స్.
కట్ చేస్తే -
సినిమా ఫీల్డులో కూడా అంతే. 1% మందే ఎప్పుడూ పనిలో బిజీగా ఉంటారు. 99% మంది పనిలేకుండా బిజీగా ఉంటారు.
బై ది వే, ఈ నిజం ఒక్క సినీఫీల్డుకే పరిమితం కాదు. ఏ ఫీల్డులోనైనా ఇదే లెక్క.
ఏ బిజీ మనకిష్టం అన్నది మనమే నిర్ణయించుకోవాలి.
- మనోహర్ చిమ్మని
.jpeg)
.jpeg)
.jpeg)
