అసలు సినిమాలెందుకు ఆగిపోతాయి?

నా చిన్నప్పటినుంచీ వింటున్నాను... బోలెడన్ని సినిమాలు రిలీజ్ కాకుండా ప్రసాద్ ల్యాబ్‌లో కుప్పలుగా పేరుకుపోయి ఉన్నాయని. అది అబధ్ధమేం కాదు. 100% నిజం. 

ఇప్పుడయితే ల్యాబ్స్ అవసరం కూడా లేదు. డిజిటల్ హార్డ్ డిస్కులు... ప్రొడ్యూసర్ దగ్గరో, డైరెక్తర్ దగ్గరో ఒక డబ్బాలో వేసి పడుంటాయి.  

ప్రతి సంవత్సరం ప్రారంభమయ్యే 250+ సినిమాల్లో... కొన్ని సినిమాలు పూర్తికాకపోవటం, పూర్తయినా రిలీజ్ కాకపోవటం అనేది ఒక అత్యంత సర్వసాధారణమైన విషాదం. 

ఈ పరిస్థితి ఒక్క తెలుగు సినిమాలకే పరిమితం కాదు. హాలీవుడ్ నుంచి టాలీవుడ్ దాకా అంతటా ఉన్నదే.

అన్నేసి కోట్లు కుమ్మరించి కూడా అసలెందుకీ పరిస్థితి? ఎందుకు సినిమాలు ఆగిపోతాయి? 

ఈ పరిస్థితికి సాధారణంగా 90 శాతం కారణం ఒక్కటే అయి ఉంటుంది... డబ్బు.  

* మనం ఎలాంటి కథతో సినిమా తీస్తున్నాం, దాని టార్గెట్ ఆడియెన్స్ ఎవరు, ఎవరితో తీస్తున్నాం, వారికి ఫీల్డులో ఉన్న మార్కెట్ ఏంటి, మనం ఆ మార్కెట్‌కు లోబడే ఖర్చు పెడుతున్నామా, మార్కెట్ పరిమితి దాటి రిస్కు తీసుకుంటున్నామా, కొత్తవాళ్ళతో తీసినప్పుడు మనం ఎదుర్కొనే రిస్కులేంటి, వాటికి సొల్యూషన్ ఏంటి... ఇవన్నీ అలోచిస్తే ఒక్క సినిమా కూడా మధ్యలో ఆగిపోదు.

* సినిమాలు ఆగిపోవడం ఎక్కువగా ముందు అనుకున్న బడ్జెట్ దాటిపోవటం వల్ల జరుగుతుంది. సగం సినిమా షూటింగ్ తర్వాత డబ్బులు అయిపోతే ఇంక చెయ్యడానికి ఏముంటుంది? 

* కొన్ని సినిమాలు పూర్తవుతాయి. కానీ, వాటిని కొని రిలీజ్  చేయడానికి డిస్ట్రిబ్యూటర్స్ ఎవరూ రారు. స్వంతంగా రిలీజ్ చేసుకొనే శక్తి నిర్మాతకి ఉండదు. 

* సినిమా బిజినెస్ అన్ని వ్యాపారాల్లా కాదు. ముందే ఒక ఖచ్చితమైన్ ప్లాన్‌తో, ప్రొడ్యూసర్-డైరెక్టర్‌ల మధ్య ఒక స్పష్టమైన అవగాహనతో... అనుకున్నది అనుకున్నట్టుగా చేస్తే ఎలాంటి సమస్యలు రావు. అలా కాకుండా ఓవర్‌కాన్‌ఫిడెన్స్‌తో ఎవరిదారిన వారు గుడ్డిగా వెళితే మాత్రం అంతిమ ఫలితం ఇలాగే ఉంటుంది.

* అరుదుగా కొన్ని సినిమాలు ఎవరో ఒకరి "ఈగో" సమస్య వల్ల కూడా ఆగిపోతాయి. 

సరిగ్గా చేసుకుంటే ఈ "షో బిజినెస్‌"ని మించిన బిజినెస్ లేదు.  డబ్బూ, డబ్బుతోపాటు ఓవర్‌నైట్‌లో మనం ఊహించనంత ఫేమ్ కూడా ఈ ఒక్క బిజినెస్‌లోనే సాధ్యం. 

ఒక్క హిట్ గానీ ఇచ్చామా... ఇంక అంతే. ప్రొడ్యూసర్ అయినా, డైరెక్టర్ అయినా... అప్పటివరకూ పడ్డ కష్టాలన్నీ హుష్ కాకి అయిపోతాయి! ఆ తర్వాత ఇంక మీరు ఏది అనుకుంటే అదే!! 

కానీ, ఆ హిట్టు రావడం అంత ఈజీ కాదు... 

- మనోహర్ చిమ్మని