అతడొచ్చాడు!

"మీకు సో అండ్ సోతో ప్రాబ్లం ఉంది. ఇప్పుడు మీరు ఆ ప్రాబ్లంతో బాధపడుతున్నారు" అన్నాడతను.

"అసలు అలాంటిదేం లేదు" అన్నాన్నేను. 

కొంచెం తడబడ్డాడతను. 

"ప్రాబ్లం ఉండాలే" అన్నాడు మళ్ళీ.

"లేదు" అన్నాను నవ్వుతూ. 

"మీకు ఆ సమస్య వస్తుంది... దగ్గరలో ఉంది" అన్నాడు మళ్ళీ.

"ఎక్కడిదాకొచ్చిందో చూసి, లైవ్ లొకేషన్ పెట్టండి" అన్నాను. 

చెప్పడానికేం లేక, మాట మార్చాడతను. 

కాని, నేను వదల్లేదు. 

"నాకున్నది ఒకే ఒక్క సమస్య. డబ్బు. ఇప్పుడు నేను చేస్తున్న సినిమా పోస్ట్ ప్రొడక్షన్ లేటవుతోంది. పదిరోజుల్లో అయిపోవాలి. ప్రిప్రొడక్షన్లో ఉన్న ఇంకో సినిమాకు రావల్సిన ఫండింగ్ లేటవుతోంది మా ప్రొడ్యూసర్‌కు. జూలైలో షూటింగ్ ఉంది. నిజంగా మీకంత పవర్ ఉంటే ఇది కూడా సెట్ చెయ్యండి. వారంలో అయిపోవాలి. మీకు మంచి ఫీజు ఇప్పిస్తాను... 5%" అన్నాను నవ్వుతూ. 

ఇబ్బందిగా నవ్వాడు. 

ఎందుకంటే ఆయన దగ్గర సమాధానం లేదు. 

కట్ చేస్తే -

నేనతన్ని జ్యోతిష్యం చెప్పమనలేదు. అతనిలో అలాంటి విద్యలున్నాయని కూడా నాకు తెలీదు. అసలు ఆ విద్యలంటేనే నాకు చాలా చిరాకు. 2025లో కూడా ఇలాంటివారున్నారా అని బాధపడతాను.  

అతను మా ఆఫీసుకి వచ్చిన పని వేరు. అది చూసుకొని వెళ్ళాలి. కాని, మనుషుల బలహీనత మీద ఆడుకునే తన పాండిత్యం నా మీద ప్రదర్శించబోయాడు. 

పాపం బ్యాడ్‌లక్... నేను అలాంటి బకరా కాలేకపోయాను. 

వెయ్యో పదివేలో రాలేవి... మిస్ అయ్యానే అని బాధపడి ఉంటాడు.

సినిమావాళ్ళ దగ్గర లక్షలు కోట్లుంటాయి. ఇలాంటివాళ్ళ మాటలకు కొందరు పడిపోతారు. వేలు, లక్షలు ఇచ్చి పూజలు చేయించుకుంటారు, పాదాభివందనాలు చేస్తారు. 

కాని, అక్కడేం జరగదు. 

ఉట్టిదే. హంబగ్.  

ఏదైనా జరిగిందీ అంటే... అది మన కృషి వల్ల, మనం చేసే నిరంతర ప్రయత్నాల వల్ల. అంతే. 

అలాగని నేను నాస్తికున్ని కాదు. 

మన సనాతన శాస్త్రాలను, ధర్మాలను నమ్మననీ కాదు. 

కాని, ఇలాంటి చెత్తరకం చీటింగులకు మాత్రం వ్యతిరేకం.    

ఇలాంటివాళ్లే యూట్యూబుల్లో "ఆ హీరోకి ప్రాణగండం ఉంది... ఈ హీరోహీరోయిన్లు విడాకులు తీసుకుంటారు... ఆ డైరెక్టర్ పనైపోయింది" అని నానా సొల్లు వాగుతుంటారు. లక్షల్లో వ్యూస్, కోట్లల్లో ఆదాయం సంపాదిస్తుంటారు. 

జస్ట్ మనిషి బలహీనత మీద!    

- మనోహర్ చిమ్మని  

100 Days, 100 Posts. 52/100.