ఇది నెగెటివిటీ కాదు. రియాలిటీ.

సినీ ఫీల్డు ఒక అద్భుత మాయాలోకం. ఇక్కడ లేనిది లేదు!

 

ఇండస్ట్రీలో కొందరికి నచ్చని ఇంకో రియలిస్టిక్ కోణంలో చూస్తే - ఇదొక హెవీ గ్యాంబ్లింగ్ స్పేస్. 

ఈ గ్యాంబ్లింగ్ అనేది ఇక్కడ కేవలం క్రియేటివిటీ,  డబ్బుతోనే కాదు, జీవితాలతో కూడా ఉంటుంది. 

ఫీల్డులో అంతా బానే ఉన్నట్టుంటుంది. కానీ, నిజంగా ఎప్పుడు బావుంటుందో ఎవరికీ తెలీదు. చూస్తుంటే నెలలూ, సంవత్సరాలూ ఇట్టే గడిచిపోతుంటాయి. ఓ అయిదేళ్ల తర్వాతో, దశాబ్దానికో, ఊహించని విధంగా "ఓవర్‌నైట్" సక్సెస్ వరిస్తుంది. రాత్రికి రాత్రే జాతకాలు మారిపోతాయి.

సక్సెస్ వరించని 95 శాతం మంది ఆర్టిస్టులు, టెక్నీషియన్ల సినీ ప్రయాణం మాత్రం అనుక్షణం మారిపోయే అగమ్యాలవైపు ఇంకా కొనసాగుతూనే ఉంటుంది. 

బార్‌లోకెళ్లినవాడు ఏ బీరో తాగాలి తప్ప, కొబ్బరినీళ్లకోసం వెతక్కూడదు. ఇక్కడ తీసుకోవాల్సిన నిర్ణయాలు ఇక్కడి స్టైల్లోనే తీసుకోవాలి. వ్యక్తిత్వాలూ, వంకాయలూ అంతా బుల్‌షిట్. 

సినిమా ఈజ్ సినిమా.

చిక్కంతా ఇక్కడే వస్తుంది. కొన్ని వెన్నతో పెట్టిన విద్యలు కావాలి. క్రాష్ కోర్స్ పెట్టినా అది అందరికీ రాదు.  

సినిమా ఒక్కటే లోకం కావాలి. ఆలోకపు ప్రాథమిక సూత్రాలే నీ జీకే కావాలి. ఆలోకపు లౌక్యమే నీ శ్వాస కావాలి. అప్పుడే నువ్వు కోరుకున్నవన్నీ అవే కలిసివస్తాయి. నువ్వు అనుకున్నది నిజమయ్యే చాన్స్ నీకు దగ్గరవుతుంది. ఏ ఓవర్‌నైట్‌లోనో నువ్వు వద్దన్నా అది నిన్ను వరిస్తుంది.   

సినిమా పుట్టినప్పటినుంచి ఇప్పటిదాకా, ఇకముందు కూడా .. హాలీవుడ్ నుంచి టాలీవుడ్ దాకా, ఎక్కడయినా.. ఈ ఫీల్డులో సక్సెస్ రేట్ ఎప్పుడూ 5 నుంచి 10 శాతం దాటదు. చెప్పాలంటే, ఇంకా తక్కువే.

అవకాశం దొరకడమే ఇక్కడ చాలా కష్టం. అలా దొరికిన అవకాశాన్ని సద్వినియోగం చేసుకోడానికి ఎందరో ఎంతో ఖర్చు చేస్తారు. ఖర్చయిపోతారు. 

డబ్బొక్కటే కాదు. జీవితం కూడా. 

ఇది నెగెటివిటీ కాదు. రియాలిటీ. 

గట్స్. 

ప్యాషన్. 

నీడ్. 

కంపల్షన్.  

గోవాలో కేసినోకి వెళ్ళినట్టు, ఇది తెలిసి ఆడే జూదం. ఒక క్రియేటివ్ గ్యాంబ్లింగ్. ఒక కల్చరల్ ఫేంటసీ. 

ఒక క్రియేటివ్ కాసినో.

- మనోహర్ చిమ్మని