అదృష్టం అన్న పదాన్ని నేను నమ్మను, కాని...

అదృష్టం అనేది ఉంది, ఉంటుంది. 

ఇది నమ్మాలంటే జీవితంలో కొన్ని ఊహించని అనుభవాలు ఎదురవ్వాలి. ఇదెలా సాధ్యం అని లాజిక్కులు పట్టుకోలేక పిచ్చెక్కిపోవాలి. ఇలా కూడా జరుగుతుందా అని షేక్ అయిపోవాలి. 

అప్పుడు మాత్రమే కొన్నిటి మీద నమ్మకం కలుగుతుంది. అందులో ఒకటి - మనం అంతకు ముందెప్పుడూ నమ్మని... అదృష్టం.  

కట్ చేస్తే - 

కొంతమంది ఊరికేనే దగ్గినా తుమ్మినా డీలాపడిపోయి, పక్కనున్నవాళ్ళని కూడా చతికిలపడేట్టు చేస్తుంటారు. ఒక కసి, పట్టుదల ఉండదు. అదొక మందులేని రుగ్మత. అది వేరే విషయం.  

కొంతమంది జాగ్రత్తగా అన్నీ ప్లాన్ చేసుకున్నట్టే కనిపిస్తారు. నిజంగా చేస్తారు కూడా. ప్రతి చిన్న విషయంలో అతి జాగ్రత్తపడతారు. జీవితంలోని ఒకటి రెండు అతి ముఖ్యమైన విషయాల్లో మాత్రం అట్టర్ ఫ్లాప్ అయిపోతారు. 

దీనికి పూర్తి వ్యతిరేకంగా - కొందరు అన్నీ చాలా కేర్‌లెస్‌గా తీసుకున్నట్టే ఉంటారు. కాని, అనుకున్న ప్రతి పనీ అలవోగ్గా అలా చేసేసుకుంటూ వెళతారు. ఎక్కడా ఒక చిన్న అడ్డంకిరాదు. వచ్చినా, దాన్ని కూడా లైట్ తీసుకుంటారు. ముందుకే వెళ్తుంటారు తప్ప... అక్కడే చతికిల పడిపోరు. 

నిజానికి ఇదంతా మన నమ్మకం, మన మైండ్‌సెట్‌ల మీదే ఆధారపడి ఉంటుంది... అని మళ్ళీ లాజిక్స్ నా వెంటపడతాయి.  

కాని, కాదు. 

ఖచ్చితంగా కాదు. 

ఇంకేదో వారికి సహాయపడుతోంది. వారిని లీడ్ చేస్తోంది. కాని, దాని గురించి వాళ్లంతగా పట్టించుకోరు. 

ఇక్కడే అదృష్టం అనే ట్రంప్ కార్డ్ ఒకటి ఉందని నాకు చాలాసార్లు అర్థమైంది. 

కాని, ఆ ట్రంప్ కార్డ్ మనకి పడాలంటే ఏంచెయ్యాలో మాత్రం తెలీదు. అది దానికదే పడాలి తప్ప, ఎదురుచూస్తే మాత్రం రాదు. 

పనే మన దేవుడు అనుకొని, నిరంతరం మన పనిలో మనం ఉండాలి. పనిచేస్తూనే ఉండాలి. ఏదో చేస్తున్నాం అని కాకుండా, మనసు పెట్టి పనిచెయ్యాలి. అదృష్టం అదే వస్తుంది. రాలేదనుకోండి... ఫరవాలేదు, మన పనే మనల్ని కాపాడుతుంది. ఎందుకంటే పనే మన దేవుడు కాబట్టి. 

కట్ చేస్తే - 

అదృష్టానికి, దేవునికీ ఏదైనా సంబంధం ఉందా అంటే నేనేం చెప్పలేను. ఒకవేళ ఎవరైనా ఉందీ అంటే మాత్రం నాకు నచ్చదు. 

ఎందుకంటే, దేవుడు అంత శాడిస్టు కాదు.  

చూశారా, చివర్లో మళ్ళీ లాజిక్కే నా ముందుకొచ్చింది! 

మీరేమంటారు... అదృష్టం ఉందా, లేదా?
మిమ్మల్ని ఎప్పుడైనా అదృష్టం వరించిందా?  

- మనోహర్ చిమ్మని