మనీ.. 3 సూత్రాలు!

ఇప్పుడు నేను చేస్తున్న రొమాంటిక్ హారర్ సినిమా స్క్రిప్టును యుకేలో ఉన్న మా ప్రొడ్యూసర్‌కి పంపించి ఒక ట్వీట్ పెడదామని ట్విట్టర్‌లోకెళ్లాను. ఇది కనిపించింది:

"Research shows that the more a boy misbehaves in school, the more likely he is to earn a lot of money as an adult!"

నా దృష్టిలో ఇదేదో ఉత్తుత్తి స్టేట్‌మెంట్ కాదు. నా అనుభవంలో నేను కూడా చూసిన ఒక సత్యం. దీనికి అనుబంధంగా మరికొన్ని నిజాలు కూడా నేను చెప్పగలను. ఎలాంటి హిపోక్రసీ లేకుండా!

> రోడ్డుమీద వెళ్తూ కనిపించిన ప్రతి రాయికీ, రప్పకూ విచిత్రంగా అలా దండం పెట్టుకుంటూ వెళ్తుంటారు కొంతమంది. వీరి వ్యవహారశైలిగానీ, భాషగానీ అవతలివారికి చాలా ఇబ్బందికరంగా ఉంటాయి. ఈ కేటగిరీకి చెందిన చాలామంది నాకు వ్యక్తిగతంగా చాలా దగ్గరగా తెలుసు. వీళ్లల్లో చాలామందికి కాగితం పైన పెన్నుపెట్టి రాయటం రాదు. కానీ వీరందరి దగ్గర డబ్బు పిచ్చిగా ఉంటుంది. పిచ్చిపిచ్చిగా సంపాదిస్తారు!

> అంతర్జాతీయంగా వివిధరంగాల్లో అత్యుత్తమ స్థాయి విజయాల్ని సాధించి బిలియనేర్లు అయినవారంతా చదువులో గుండు సున్నాలే. లేదా స్కూల్, కాలేజ్ స్థాయిలో "డ్రాప్ అవుట్"లే!    

> సినీ ఫీల్డులో కూడా అంతే. అత్యున్నతస్థాయి విజయాలు సాధించి కోట్లు సంపాదించుకున్న ఆర్టిస్టులూ, టెక్నీషియన్లూ అంతా చదువుకు పంగనామాలు పెట్టినవాళ్లే!

కట్ టూ నీతి -        

1. చదువుకోనివాడి లక్ష్యం స్పష్టంగా ఉంటుంది. మొండిగా ఆ ఒక్కదాని గురించే కష్టపడి సాధిస్తాడు.

2. చదువుకున్నవాడికి పది లక్ష్యాలుంటాయి. పది పడవలమీద కాళ్లు పెడతాడు. ఏ ఒక్కటీ సాధించలేడు.

3. చదువుకు, సంపాదనకు అస్సలు సంబంధం లేదు. "నేనెంత సంపాదించాలి? దానికోసం నేనేం చేయాలి?" అన్న వెరీ సింపుల్ 'ఫినాన్షియల్ ఇంటలిజెన్స్' చాలు.

4. పైన 1, 2, 3 లను చాలా ఆలస్యంగా రియలైజ్ కావడమంత దురదృష్టం ఇంకొకటి లేదు. 

మన హీరోయిన్స్ కూడా మంచి ఫిలిమ్‌మేకర్స్ కాగలరు!

ఈ విషయాన్ని గతంలో అంజలీదేవి, విజయనిర్మల వంటివాళ్లు ఎప్పుడో ప్రూవ్ చేసేశారు. ఇటీవలి కాలంలో మాత్రం ఇది చాలా అరుదయిన విషయమైపోయింది. ముఖ్యంగా తెలుగులో.  

సుమారు ఓ రెండువారాలక్రితం అనుకుంటాను. ఒక పాపులర్ హీరోయిన్ నా ఫేస్‌బుక్ కి యాడ్ రిక్వెస్ట్ పంపించింది. హీరోయిన్ కదా.. సహంజంగానే యాడ్ చేసేసుకున్నాను.

రెండు మూడు ఊహించని ప్రశ్నలతో ప్రారంభమై, కొంచెం తడబడి, తర్వాత స్పీడందుకొని, చివరకు మా ఇద్దరి దినచర్యలో ఒక రొటీనయిపోయింది మా కమ్యూనికేషన్.    

అంతకు ముందు ఈ హీరోయిన్ కొన్ని తెలుగు సినిమాలుచేసింది. ఇప్పుడు ఎక్కువగా తమిళం, మళయాళం లలో చేస్తున్నట్టుంది. ప్రస్తుతం ఈ హీరోయిన్ మళయాళంలో ఓ మంచి బోల్డ్ వుమెన్-సెంట్రిక్  ఫిలిం చేస్తోంది.

కట్ టూ పాయింట్ - 

సాధారణంగా హీరోయిన్స్‌లో అత్యధిక శాతం మంది ఫిలిం మేకింగ్, ఫైనాన్స్, బిజినెస్, మార్కెటింగ్ వంటి వ్యవహారాలవైపు అసలు ఆసక్తి చూపించరు. వాళ్ల రెమ్యూనరేషన్, రోల్, బ్యానర్, డైరెక్టర్, హీరో, డేట్స్ .. అంతే.
ఏ హీరోయినయినా ఈ అయిదారు అంశాలు తప్ప దాదాపు మరోవిషయం పట్టించుకోదు.

అలాంటి నేపథ్యంలో, అనుకోకుండా .. ఈ హీరోయిన్‌తో, ఫిలిం మేకింగ్ లో వచ్చిన ఇటీవలి సరికొత్త పరిణామాలగురించి మా మధ్య ఆసక్తికరమైన చర్చ జరిగింది.

నేనసలు ఎదుటివారిని ఎప్పుడూ తక్కువగా అంచనా వేయను. నాకంటే కనీసం పది రెట్లు గొప్పవారిగా భావిస్తూ మాట్లాడతాను. ప్రవర్తిస్తాను. అయితే - కొంచెం మితిమీరిన ఆత్మవిశ్వాసంతో ఆమెకు ఇవన్నీ మరీ లోతుగా తెలిసే అవకాశం లేదు అనుకొని.. ఆ టాపిక్‌ని అలా మీద మీద టచ్ చేసి వదిలిపెట్టాను.

కానీ, ప్రపంచవ్యాప్తంగా టెక్నికల్‌గా, మార్కెటింగ్‌పరంగా ఫిలిం మేకింగ్‌లో వస్తున్న లేటెస్ట్ ట్రెండ్స్‌ని గురించి, కేవలం క్షణాల్లో, ఈ హీరోయిన్ నాకు అందించిన సమాచారంతో నేను నిజంగానే "వావ్" అనుకున్నాను. ఫిలిం మేకింగ్ కి సంబంధించి ఈ హీరోయిన్‌కు ఉన్న పరిజ్ఞానంలో కనీసం పదిశాతం అయినా మన ప్రొడ్యూసర్స్‌కు ఉంటే బాగుండును అనిపించింది.

ఈ విషయంలో అనుకోకుండా ఓ టాపిక్ మీద చర్చ వచ్చింది కాబట్టి ఇదంతా నాకు తెలిసింది. ఆ టాపిక్కే రాకపోతే మిగిలిన అందరు హీరోయిన్లలానే తననూ అనుకునేవాన్నేమో!

ఇలా బయటికి అసలు ఎక్స్‌పోజ్ కాకుండా ఇంకెంతమంది హీరోయిన్లు.. ఫిలిం మేకింగ్, బిజినెస్‌లోని లేటెస్ట్ ట్రెండ్స్ పట్ల లోపల్లోపలే ఎంత ఆసక్తితో, ఎంత స్టడీ చేస్తున్నారో ఎవరికి తెలుసు?

నా ఈ కొత్త (పాపులర్ హీరోయిన్) ఫేస్‌బుక్ ఫ్రెండ్ ద్వారా "హీరోయిన్స్ కూడా మంచి ఫిలిం మేకర్స్ అవుతారు" అన్నది నేను తెలుసుకొన్న ఓ కొత్త నిజం. 

సక్సెసే నిజం.. మిగిలిందంతా అబధ్ధం!

"మనం" సినిమాకు అద్భుతమైన సంగీతం అందించిన అనూప్ రూబెన్‌తో నేనొక రెండు సార్లు మాట్లాడాను. అప్పుడు అనూప్‌ని నాకు పరిచయం చేసింది, నేను పరిచయం చేసిన నా ఇంకో మిత్రుడు, కోరియోగ్రాఫర్ నిక్సన్.

ఇది దాదాపు ఓ పదేళ్లక్రితం నాటి విషయం.

అప్పుడు అనూప్ మాట్లాడిన మాటల్లోని ఆ స్వచ్చత, నెమ్మదితనం, అణకువ నాకిప్పటికీ గుర్తున్నాయి. నేనూ, నిక్సన్ ఆరోజే అనుకున్నాం. అనూప్ ఒక రేంజ్ కి ఎదుగుతాడని!

ఇదేదో ఇప్పుడు అనూప్ టాప్ రేంజ్ మ్యూజిక్ డైరెక్టర్ అయ్యాక చెప్తున్న మాటకాదు. అప్పుడు అతను చేస్తున్న మ్యూజిక్ మాకు తెలుసు. ఎంతమంది మ్యూజిక్ డైరెక్టర్ల దగ్గర అతను ఎలా పనిచేసిందీ మాకు తెలుసు. మొత్తంగా మ్యూజిక్ పట్ల అతనికి ఉన్న ప్యాషన్ మాకు తెలుసు. అతని గురించి పరిచయం ఉన్న అందరికీ తెలుసు.

కట్ టూ ప్రదీప్‌చంద్ర - 

ఇవాళ నేను కొత్తగా పరిచయం చేస్తున్న మా మ్యూజిక్ డైరెక్టర్ ప్రదీప్‌ని చూస్తోంటే, అతనితో మాట్లాడుతోంటే.. నాకెందుకో పదేళ్లక్రితం నాటి అనూప్ గుర్తొచ్చాడు.

ఎమ్‌టెక్ కంప్యూటర్ ఇంజినీరింగ్ చదివిన ప్రదీప్‌కు ఉద్యోగం చెయ్యటం కన్నా మ్యూజిక్ మీదే ప్రాణం. ప్యాషన్.
ఐ విష్ హిమ్ ఆల్ సక్సెస్.

అయితే.. నాకయినా, ప్రదీప్‌కయినా, ఎవరికయినా.. లక్ష్యం ఒక్కటే ఉండాలి. పదిపడవలమీద కాళ్లు పెట్టినవారు ఎవ్వరూ సక్సెస్ సాధించలేరు. అన్నీ కలిసిరావాలి. కలిసివచ్చేలా చేసుకోవాలి. అప్పటిదాకా కష్టపడాలి. పడుతూనే ఉండాలి.

ఏ ఫీల్డులోనయినా, ఎవరయినా విజయం సాధించేది ఇలాగే. ఇదేం రహస్యం కాదు. రాకెట్ సైన్స్ కాదు. నిజం.    

కొత్త తెలుగు హీరోయిన్ అన్వేషణ!

ఇప్పుడు నేను చేస్తున్న కొత్త సినిమాలో ఇద్దరు కొత్త హీరోయిన్లకు అవకాశం ఉంది. 18-23 సంవత్సరాలమధ్య ఉంటే చాలు. ఇతర కామన్ క్వాలిఫికేషన్లు మామూలే. వాటితోపాటు - సినిమాలమీద, నటన మీద ఆసక్తి, హీరోయిన్ అవ్వాలన్న ప్యాషన్ చాలా అవసరం. మీరు హైదరాబాద్‌లో ఉంటే మరీ మంచిది.

ఇదొక కామెడీ రొమాంటిక్ హారర్ చిత్రం. పూర్తిస్థాయి కమర్షియల్ సినిమా.

దీన్నిబట్టి, నిజంగా అంత స్థాయి ఆసక్తి, అర్హత ఉన్న ఔత్సాహిక కొత్త హీరోయిన్లు మీ మొబైల్ నంబర్ ఇస్తూ, ఫోటోలని ఈమెయిల్ చెయ్యండి. పేరెంట్స్ అనుమతి తప్పనిసరి. "మా పేరెంట్స్ అనుమతితోనే నేను ఈ మెయిల్ పంపిస్తున్నాను" అని స్పష్టంగా మీ మెయిల్లో ఉండాలి.

ఉంటే .. మీ ఫేస్‌బుక్, యూట్యూబ్ వీడియో క్లిప్స్ లింక్స్ కూడా పంపించండి.

ఈ చిత్రం షూటింగ్ అక్టోబర్ చివరి వారం నుంచి ఒకే షెడ్యూల్లోపూర్తవుతుంది.  

ఇది పూర్తిగా ఫిలిమ్‌మేకింగ్‌లో వచ్చిన లేటెస్ట్ టెక్నాలజీని ఉపయోగించి తీస్తున్న సినిమా. యునిట్, యూనియన్ రూల్స్, కాల్‌షీట్ టైమింగ్స్, బేటాలు, డబుల్ బేటాలు వంటి ట్రెడిషనల్ మేకింగ్ పధ్ధతులేవీ ఇక్కడ ఉండవు. మేకింగ్‌లో, ప్రమోషన్‌లో కూడా ఎలాంటి కాంప్రమైజ్ ఉండదు. ఒక టీమ్‌గా అందరం సినిమా కోసం, దాని సక్సెస్ కోసం పనిచేయడమే ముఖ్యం. అదొక్కటే గోల్.

ఆసక్తి, అర్హత ఉన్న తెలుగు అమ్మాయిలు  పైన చెప్పిన వివరాలతో మీ ఈమెయిల్ పంపించాల్సిన అడ్రస్ ఇది:
mchimmani10x@gmail.com

ఇగ ఫాక్టరీ షురూ!

"సినిమా తీయాలన్న కమిట్‌మెంట్ ఉంటే చాలు. డబ్బులు ఎప్పుడూ సమస్య కాదు."

ఈ మాటలన్నది ఎవరో కాదు. ప్రపంచ ప్రఖ్యాత దర్శకుడు సత్యజిత్ రే!

ఎలా కాదనగలం?

సత్యజిత్ రే "పథేర్ పాంచాలి" అలాగే తీశాడు. ఉద్యోగం చేస్తూ, జీతం వచ్చినపుడల్లా ఆ డబ్బుతో షూటింగ్ ప్లాన్ చేస్తూ, మరికొంతమంది మిత్రుల ద్వారా కూడా అవసరమయిన డబ్బు ఎప్పటికప్పుడు సమకూర్చుకుంటూ, అంచెలంచెలుగా తీశారు. అలాంటి అనుభవంతో చెప్పిన మాట అది. ఆ సినిమానే ఆయనకు అంత పేరు తెచ్చిపెట్టింది. ఆ తర్వాత సత్యజిత్ రే ఇంకెన్నో పిక్చర్లు తీశారు. ఆయన అనుకున్న సినిమాలే తీశారు.

విషయం ఇక్కడ ఆర్ట్ సినిమాలా, కమర్షియల్ సినిమాలా అన్నది కాదు. అనుకున్న సినిమాని ఒక కమిట్‌మెంట్ తో చేయగలగటం.

అసలు సినిమాలా ఇంకొకటా అన్నది కూడా సమస్య కాదు. చేయాలనుకున్నపని మీద ఒక క్లారిటీ, ఒక కమిట్‌మెంట్ ఉండటం. ఏది ఎలా ఉన్నా, దానిమీదే దృష్టిపెట్టి ఆ పనిని పూర్తి చేసెయ్యటం.

కట్ టూ మన ఫాక్టరీ - 

సినిమా తీయాలనుకుంటే ఇప్పుడు డబ్బు సమస్య కాదు. అంత తక్కువ బడ్జెట్ లో ఇప్పుడు ఎవరయినా సినిమా తీయొచ్చు. అంతా కొత్తవాళ్లతో, నేచురల్ లొకేషన్లలో సినిమా తీస్తే - దాదాపు అది "నో బడ్జెట్" సినిమానే! కొంచెం పేరున్న హీరో హీరోయిన్లయినా సరే, ఫిలిమ్‌మేకింగ్‌లో వచ్చిన లేటెస్ట్ టెక్నాలజీ ఇప్పుడు అంత సౌకర్యం కల్పిస్తోంది.

ఇటీవలి కాలంలో వచ్చిన ఎన్నో యూత్ ఫుల్ కమర్షియల్ సినిమాలు, థ్రిల్లర్‌లు ఈ విషయాన్ని నిరూపించాయి. పుష్కలంగా డబ్బుల వర్షం కురిపించాయి.

కేవలం బడ్జెట్ దృష్టితో చూస్తే, వీటిని కమర్షియల్ ఆర్ట్ సినిమాలనవచ్చేమో! లేటెస్ట్ ఆన్‌లైన్ ప్రమోషన్ టెక్నిక్స్‌తో ఒక ఆట ఆడుకోవచ్చు. కావల్సినంత హల్‌చల్ క్రియేట్ చేయొచ్చు. ఏ కొంచెం హిట్ టాక్ వచ్చినా, వీటి కలెక్షన్ ఇంచుమించు పెద్ద సినిమాలకు పోటీగా ఉంటుంది. ఈ రేంజ్ బడ్జెట్ లో అసలు రిస్క్ అనేదే ఉండదు. ఇంకేం కావాలి?

ఇప్పుడు నేను ప్లాన్ చేస్తున్న తాజా సినిమా ఇలాంటిదే.

యూత్‌ఫుల్ రొమాంటిక్ కామెడీ థ్రిల్లర్!

నాలుగయిదు రోజుల్లో పూర్తి వివరాలు ప్రెస్‌లో రానున్న ఈ చిత్రంలో ప్రముఖ హీరో హీరోయిన్లే లీడ్ పాత్రలు వేస్తున్నారు. ఒక పక్కా  కమర్షియల్ సినిమా. కౌంట్‌డౌన్ ఆల్రెడీ స్టార్ట్ అయింది. అక్టోబర్ చివరినుంచి సింగిల్ షెడ్యూల్ షూటింగ్.

ఈ సినిమా పోస్ట్ ప్రొడక్షన్‌లో ఉండగానే మరో సినిమా. ఆ ఏర్పాట్లు కూడా మరోవైపు ఫుల్ స్వింగ్‌లో ఉన్నాయి.

సో, ఇగ మన ఫాక్టరీ షురూ అన్నమాట...

ప్రెస్ నిజంగా ఎంత గొప్పది?

లేకపోతే.. మొత్తం మీడియా నోటికే టేప్ అంటించిన ఆ "మగ సెక్స్ క్లయింట్" గొప్పవాడా? ..

సినిమాలో "హాఫ్‌వే ఓపెనింగ్"లా ఇలా నేరుగా పాయింట్‌లోకే వెళ్లి ఈ బ్లాగ్ పోస్ట్ రాయడానికి కారణం చాలా బాధాకరమైంది. సిగ్గుతో తల దించుకోవాల్సింది.

మొన్న సెప్టెంబర్ 2 నాడు హైద్రాబాద్‌లోని ఒక స్టార్ హోటల్లో ఒక హీరోయిన్ వ్యభిచారం చేస్తూ "రెడ్ హాండెడ్"గా పోలీసులకు పట్టుబడిన బ్రేకింగ్ న్యూస్‌లు మనం చూశాం.. చదివాం.. విన్నాం.

నిన్న రాత్రి ఒక వర్ధమాన దర్శకురాలి నుంచి నాకో ఆన్‌లైన్ పిటిషన్ లింక్ ఫేస్‌బుక్ మెసేజ్ ద్వారా అందింది. ipetitions లోని ఆ పిటిషన్ పూర్తిగా చదివాను. సంఘీభావంగా నేనూ ఆన్‌లైన్ సిగ్నేచర్ చేశాను.

ఎంత నికృష్టమైన వ్యవస్థలో మనం ఉన్నామో ఆ పిటిషన్ చదివాక తలెత్తే ఈ ప్రశ్నలు చూస్తే మీకే అర్థమవుతుంది:

> వ్యభిచారం చేస్తూ "రెడ్ హాండెడ్"గా హీరోయిన్ పోలీసులకి దొరికిపోయిందన్నారు. అంటే అక్కడ ఆమెతోపాటు గడిపిన ఆ మగ "సెక్స్ క్లయింట్" కూడా ఉన్నట్టేగా?  అలాంటప్పుడు అతని పేరు ఎందుకని బయట పెట్టలేదు? కేవలం ఆ హీరోయిన్ పేరునే ఎందుకు బయటపెట్టి పదే పదే "బ్రేకింగ్ న్యూస్"లతో ఊదరగొట్టారు?  

> దీన్నే ఇలా కూడా అడగొచ్చు:
పోలీసులు రెడ్ హాండెడ్ గా పట్టుకున్నపుడు ఈ సెక్స్ రాకెట్ నడిపిన బ్రోకర్ కూడా దొరికాడు. హీరోయినూ దొరికింది. కానీ, ఆ హీరోయిన్‌తో పాటు ఉన్న ఆ మగ సెక్స్ క్లయింట్ ఎందుకు దొరకలేదు? దొరికితే అతనెవరు? దొరక్కపోతే అది "రెడ్ హాండెడ్" ఎలా అవుతుంది?

> రేప్‌లు, ఇలాంటి విషయాల్లో స్త్రీలు/అమ్మాయిల పేర్లు బయటపెట్టకూడదన్న సెన్సిటివిటీని అటు పోలీసులు గానీ, ఇటు ప్రెస్ మీడియాగానీ ఎందుకు పాటించలేదు? ఇది యాంటీ వుమెన్ ధోరణి కాదా?    

> "ఒక స్టార్ హోటల్లో" రెడ్ హాండెడ్‌గా ఈ గొప్ప రాకెట్‌ని కనుగొన్న మన పోలీసులు ఆ స్టార్ హోటల్ పేరెందుకు దాయటం? కారణం ఏంటి?

> ఆ హీరోయిన్ను ఏ చట్టాలకిందనయితే బుక్ చేసి అరెస్ట్ చేశారో, అదే నేరంలో భాగస్తుడయిన ఆ మగ సెక్స్ క్లయింట్‌ను కూడా అదే చట్టాల ప్రకారం బుక్ చేసి అరెస్ట్ చేయాలి కదా? అలా ఎందుకని చేయలేదు? కనీసం అతని పేరయినా బయటికి రాలేదెందుకు?  

> స్టార్ హోటల్స్‌లో, ఇంకా ఎన్నో గెస్ట్ హౌజ్‌ల్లో, ఫామ్ హౌజ్‌ల్లో, ఇంకా ఎక్కడెక్కడో ఇట్లాంటివి ఎన్నో జరుగుతుంటాయి. తప్పు ఎవరు చేసినా తప్పే. ఒక్క సినిమావాళ్లు మాత్రమే "బ్రేకింగ్ న్యూస్"లకు పనికొస్తారు! ఎందుకంటే "సినిమా" పదానికున్న గ్లామర్. ఆ గ్లామరస్ న్యూస్ ద్వారా వచ్చే సెన్సేషన్. టి ఆర్ పి రేటింగులు. ఇది నిజం కాదా?

> కేవలం ఆ హీరోయిన్ పేరుతోనే టి ఆర్ పి రేటింగులు పెంచుకొనే ప్రయత్నంలో పోటీపడటం తప్ప - ఆ మగ క్లయింట్ ఎవరో కూడా కనుక్కొని బయటపెట్టాల్సిన బాధ్యత ప్రెస్ మీడియాకు లేదా?

> నిజంగా ఆ క్లయింట్ అంత పెద్ద మనిషే అయితే.. అతని పేరు బయటపెట్టడానికి ఏవయినా "ప్రెషర్స్" ఉన్నట్టయితే.. అతనితోపాటు ఆ హీరోయిన్‌ను కూడా హెచ్చరించి వదిలివేయాల్సింది! ఎందుకు తను ఒక్కదాన్నే అరెస్ట్ చేసి, ప్రెస్‌లో స్టేట్‌మెంట్లు ఇప్పించి.. ఏదో అమెరికా కనుక్కున్నట్టు గొప్పలు చెప్పుకోవడం?

> పైదంతా ఒక కోణం. కాగా, అంతకు ముందు తనకు "ఒప్పుకోలేదు" అన్న పగతోనో, ఈగోతోనో ఆ హీరోయిన్‌ను కావాలనే ఇలా ఇరికించారన్నది ఈ మొత్తం బ్రేకింగ్ న్యూస్ లోని ఇంకో యాంగిల్! ఇదే నిజం కావొచ్చని చాలామంది అనుకొంటున్నారు. నమ్ముతున్నారు. ఒకవేళ నిజం కానట్టయితే - ఆ మగ సెక్స్ క్లయింట్ ఇప్పటికే అరెస్టయి ఉండాలి. అతను, అతని పేరు, హోదా కూడా ఆ హీరోయిన్ పేరుతో సమానంగా బ్రేకింగ్ న్యూస్‌లో వచ్చి తీరాలి. అలా ఎందుకని జరగలేదు? జరగలేదంటే ఈ అనుమానమే నిజం కావొచ్చుగా?  ..

ఆన్‌లైన్ పిటిషన్ ద్వారా వందలాదిమంది కళాకారులు, రచయితలు, సినీ ఇండస్ట్రీ, విద్యావేత్తలు, ప్రొఫెషనల్స్, ఎన్ జీ వో లు అడుగుతున్న ఈ ప్రశ్నలకు జవాబులు ఎవరిస్తారు?

ఆ హీరోయిన్‌ను రెడ్ హాండెడ్‌గా పట్టుకొని సెక్స్ రాకెట్‌ను "ఛేదించిన" పోలీసులా? అంతా "కవర్" చేసేసి ఒక్క హీరోయిన్‌ను మాత్రమే బలిపశువును చేసిన మీడియానా?

మిలియన్ డాలర్ కొశ్చన్..  

సోషల్ మీడియా ఉద్యమం!

2004 లో, సరిగ్గా పదేళ్ల క్రితం ఫేస్‌బుక్‌ను రూపొందిస్తున్నప్పుడు, మార్క్ జకెర్‌బర్గ్ దాని సక్సెస్‌ను బహుశా ఈ రేంజ్‌లో ఊహించి ఉండడు.

ఆ తర్వాత కేవలం మూడంటే మూడేళ్లలో, 2007 లో, జకెర్‌బర్గ్‌ను ఒక బిలియనేర్‌ను చేసింది ఫేస్‌బుక్ సక్సెస్. అప్పుడు అతని వయసు 23 సంవత్సరాలు!

ఒక మిలియన్ యుఎస్ డాలర్లు అంటే మన ఇండియన్ కరెన్సీలో ఇప్పుడు సుమారు 6 కోట్లు. అలాంటి మిలియన్లు 1000 సంపాదించినవాడు బిలియనేర్‌. ఇక లెక్క మీరే వేసుకోండి ..

డబ్బు విషయం అలా వదిలేద్దాం.

కట్ టూ మన ఉద్యమం - 

ఫేస్‌బుక్‌ను క్రియేట్ చేస్తున్నప్పుడు - నిజంగా అది ఏ స్థాయిలో ప్రపంచవ్యాప్తంగా ప్రజల్లోకి, వారి జీవితాల్లోకి చొచ్చుకుపోగలిగి, ఎలాంటి అద్భుత ఫలితాలు రావడానికి కారణమవుతుందో కూడా ఆనాడు ఊహించి ఉండడు జకెర్‌బర్గ్.

దీనికి ది బెస్ట్ ఉదాహరణ తెలంగాణ ఉద్యమమే!

బహుశా, ఫేస్‌బుక్ వెలుగులోకి వచ్చిన 2004 సంవత్సరం నుంచి ఇప్పటివరకూ, ప్రపంచంలో ఏ ఇతర రాజకీయ ఉద్యమమూ దాన్ని ఈ స్థాయిలో ఉపయోగించుకొని ఉండదు.

ఫోటోలు, కొటేషన్లు, ఉత్తుత్తి లైక్‌లు, కామెంట్‌లకే కాదు.. న్యాయపరమైన హక్కులకోసం పోరాడే ఉద్యమ విజయాలకు కూడా ఫేస్‌బుక్ ఉపయోగపడగలదన్నదానికి తెలంగాణ ఉద్యమమే ఓ పెద్ద ఉదాహరణ.

ఈ ఒక్క టాపిక్ మీదే, అప్పుడే .. పొలిటికల్ సైన్స్, సోషియాలజీ వంటి సబ్జెక్టుల్లో ప్రపంచవ్యాప్తంగా యూనివర్సిటీ స్థాయిలో పరిశోధనలు ప్రారంభమయ్యాయంటే దీని ప్రాధాన్యత అర్థం చేసుకోవచ్చు.    

లక్షలాదిమంది తెలంగాణ ఫేస్‌బుక్ యూజర్‌లు ఉద్యమం కోసం పోస్ట్ చెయ్యని రోజు లేదు! ఎవరి టైమ్‌లైన్ చూసినా తెలంగాణకు సంబంధించిన పోస్టులు, షేరింగ్‌లే! ఎవరు రోజుకు ఎన్ని లైక్‌లు చేసినా .. అందులో కనీసం ఒక్కటయినా తెలంగాణకు, ఉద్యమానికి సంబంధించిందే!

అంతేనా?!

ఎన్ని వందల ఫేస్‌బుక్ పేజ్‌లు .. ఎన్ని వందల ఫేస్‌బుక్ గ్రూప్‌లు .. అన్నీ తెలంగాణ ఉద్యమాన్ని ప్రమోట్ చేసేవే!

ఇవన్నీ చేయడానికి ఏ రాజకీయ పార్టీనో, ఏ రాజకీయ నాయకుడో, ఏ తెలంగాణ ధనవంతుడో, ఏ దాతనో .. లక్షలు, కోట్లు కుమ్మరించలేదు. ఎవరూ ఇలాచేయండని "ఫేస్‌బుక్ మార్కెటింగ్" టెక్నిక్స్ వారికి చెప్పలేదు. అన్నీ తెలంగాణ ప్రజలు ఎవరికివారే స్వచ్చందంగా చేశారు. అన్ని మెలకువలూ వాటికవే వచ్చాయి.

దీనంతటి ప్రభావం తెలంగాణ ఉద్యమం పైన, ఇటీవలి ఎన్నికల పైనా చాలా ఉంది.

మార్క్ జకెర్‌బర్గే స్వయంగా ఆశ్చర్యపోయే స్థాయిలో .. అసలు ఇంత సహజంగా, ఇదంతా ఎలా సాధ్యమైంది?

దీనికి సమాధానం - ఒక్కటే పదం.

తెలంగాణ!

తెలంగాణ కోసం ఉద్యమించిన వందలాది నాయకులు, వేలాది సంఘాలు, కోట్లాది ప్రజలు ..

వీళ్లందరిలో అగ్గి రగిల్చి, దాన్ని ఆరిపోకుండా జ్వలింపజేసి, తన జీవితాన్నే ఫణంగా పెట్టి .. ఉద్యమాన్ని ఉరకలెత్తించిన ఒక వ్యక్తి కూడా ఉన్నారు.

ఆ వ్యక్తి, ఉద్యమ శక్తి ..

కెసీఅర్!

ఓకే. తెలంగాణ వచ్చింది. కె సి ఆర్ ముఖ్యమంత్రి అయ్యారు. ఇంతటితో ఫేస్‌బుక్ పని అయిపోయినట్టేనా? సోషల్ మీడియా పని అయిపోయినట్టేనా?

కానే కాదు. అసలు ఉద్యమం ముందుంది.

అది .. ప్రతి తెలంగాణ బిడ్డ కోరుకొంటున్న, కె సి ఆర్ కలగన్న 'బంగారు తెలంగాణ' సాధన.

దీనికోసం కూడా కోట్లాది తెలంగాణ ఫేస్‌బుక్ యూజర్‌లు, ట్విట్టర్ యూజర్‌లు, బ్లాగర్‌లు, వందలాది ఎఫ్ బి పేజ్‌లు, గ్రూప్‌లు .. ఎవరి స్థాయిలో వాళ్లు రెట్టించిన ఉత్సాహంతో కృషి చేస్తున్నారు.

అంతకుముందు ఎన్నడూ లేనివిధంగా - మంత్రులు, ఎమ్మెలేలు, ఎంపిలు, కార్యకర్తలు, వారు వీరు అనిలేకుండా .. అంతా కూడా .. ఇప్పుడు సోషల్ మీడియా దుమ్ముదులిపేస్తున్నారు.

జకెర్‌బర్గ్ ఊహించని సోషల్ మీడియాని అతనికి చూపిస్తున్నారు.

ఎం పి కల్వకుంట్ల కవిత, ఇరిగేషన్ మినిస్టర్ హరీష్ రావు, ఐ టి మినిస్టర్ కె టి ఆర్ ల యాక్టివ్ ట్వీట్స్ గురించి కూడా ప్రత్యేకంగా ఇక్కడ చెప్పాల్సిన అవసరముంది. ప్రభుత్వం చేస్తున్న పనులగురించి, తీసుకొంటున్న నిర్ణయాల గురించి, ఇతర ఎన్నో యాక్టివిటీస్ గురించి ఎప్పటికప్పుడు ట్వీట్స్ రూపంలో వీరు పెడుతున్న అప్‌డేట్స్, ఫోటోలు ప్రధానంగా యువతను, మొత్తంగా తెలంగాణ నెటిజెన్స్‌ను బాగా ఉత్సాహపరుస్తున్నాయి.

అలాగే -  డిప్యూటి సి ఎం, హెల్త్ మినిస్టర్ రాజయ్య, హోమ్ మినిస్టర్ నాయిని నరసిం హరెడ్డి, ఫైనాన్స్ మినిస్టర్ ఈటెల రాజెందర్, వరంగల్ ఎమ్మెల్లే కొండా సురేఖ.. దాదాపు ప్రతి ఒక్కరూ ఇప్పుడు ఫేస్‌బుక్ ను, ట్విట్టర్‌ను ఉపయోగిస్తున్నారంటే సోషల్ మీడియా పవర్‌ని అర్థం చేసుకోవచ్చు.

మరోవైపు తెలంగాణ ప్రభుత్వం కూడా ఇటీవలే ఈ వైపు కూడా ఎంటరయి .. సి ఎం ఓ, పోలీస్ శాఖ లతో ప్రారంభించి, దాదాపు అన్ని శాఖల సమాచారంతో సోషల్ మీడియాలో పిచ్చి స్పీడ్‌తో ముందుకు దూసుకుపోతోంది.

ఇదిలా ఉంటే, ఈ బ్లాగ్ రాస్తున్న సమయానికి - తెలంగాణ సి ఎం ఓ పేజ్‌కి 70,460 లైక్స్, సి ఎం కల్వకుంట్ల చంద్రశేఖరరావు (కె సి ఆర్) పేజ్‌కి 90,222 లైక్స్ ఉన్నాయి. ఈ అంకె త్వరలోనే లక్ష దాటుతుంది. మిలియన్‌ను కూడా చేరుకుంటుంది. కోటిని తాకినా ఆశ్చర్యం లేదు.

సోషల్ మీడియా అంటే ఏదో టైమ్‌పాస్‌కు పోస్ట్ చేసే ఉత్తుత్తి ఫోటోలు, కొటేషన్లు, లైక్‌లు, కామెంట్లు మాత్రమే కాదు. ఉపయోగిస్తే అదొక ఉద్యమం కూడా!  

ఇది కోపరేటివ్ ఫిలిమ్ మేకింగ్ ట్రెండ్!

మొన్నటి "Iceక్రీమ్" సినిమాతో మరో పెద్ద ట్రెండ్‌కి తెరతీశాడు వర్మ. దాని పేరు "కోపరేటివ్ ఫిలిమ్ మేకింగ్".

పాతవాళ్లయినా, కొత్తవాళ్లయినా - ఆర్టిస్టులు, టెక్నీషియన్లకు ఒక్క రూపాయి రెమ్యూనరేషన్ కూడా ముందు ఇవ్వటం అనేది ఉండదు. సినిమా పూర్తయ్యి, రిలీజయ్యి, లాభాలు వచ్చాకే ఆ విషయం! దీనికి ఒప్పుకున్నవాళ్లే సినిమాలో పనిచేస్తారు.

చాలా మంచి కాన్‌సెప్ట్ ఇది. ఈ వ్యాపారానికి సంబంధించి ఇదే కరెక్టు. ముఖ్యంగా మైక్రో బడ్జెట్ / నో బడ్జెట్ సినిమాలకు సంబంధించి మాత్రం ఇదే చాలా చాలా కరెక్టు.

కొత్తవాళ్లతో చేసే సినిమాలకు "టాక్" వచ్చేదాకా మంచి ఓపెనింగ్స్ ఉండవు కాబట్టి ప్రమోషన్ పరంగా ఎన్నో జిమ్మిక్కులు చేయాల్సి ఉంటుంది. అయినా హిట్టో, ఫట్టో ముందే ఎవరూ చెప్పలేరు. ఇలాంటి పరిస్థితుల్లో ముందు ప్రొడ్యూసర్‌ను కొంతయినా బ్రతికించుకోవాలంటే ఇదే మంచి పధ్ధతి.

ఇదిలా ఉంటే - ఈ సినిమా షూట్ చేయడానికి ఉపయోగించిన కెమెరాలు బ్లాక్ మ్యాజిక్, గోప్రో. కొంటే ఒక లక్షలోపే ఈ రెండూ వస్తాయి. మిగిలిందంతా మన చేతుల్లో పని..

టీమ్ వర్క్. కంటెంట్. ప్రమోషన్. ఈ తరహా సినిమాలు తీయాలంటే ఈ మూడే చాలా ముఖ్యమైనవి.

కంటెంట్ పరంగా  "Iceక్రీమ్" హిట్టా ఫట్టా అనేది పక్కనపెడితే - బిజినెస్ పరంగా అది పెద్ద హిట్టు అనే నా ఉద్దేశ్యం. ఈ సినిమా హల్‌చల్ పుణ్యమా అని వర్మ ఇంకో 3 సినిమాలు మొదలెట్టాడు మరి!

Iceక్రీమ్2, XES, కోరిక ..

వీటిల్లో ఒక సినిమా షూటింగ్ అయిపోయింది కూడా!

కట్ టూ చిమ్మని మనోహర్ - 

ఫిలిం ప్రొడక్షన్‌కు సంబంధించి దాదాపు ఇదే కాన్సెప్ట్‌తో అతి త్వరలో నేను కొన్ని యూత్ ఎంటర్‌టైనర్‌లు, థ్రిల్లర్ సినిమాలు ప్లాన్ చేస్తున్నాను. ఆసక్తి ఉన్న పాత/కొత్త హీరోలు, హీరోయిన్లు, సపోర్టింగ్ ఆర్టిస్టులు, టెక్నీషియన్లు పక్కనున్న ఈమెయిల్ ద్వారా నన్ను నేరుగా కాంటాక్ట్ చేయవచ్చు.

జస్ట్ కౌంటింగ్ డౌన్ డేస్ ..
9, 8, 7, 6, 5, 4, 3, 2, 1, 0 ..   

హాఫ్ గాళ్‌ఫ్రెండ్!

ఇండియాలో పదిలక్షల కాపీలు అమ్మిన మొట్టమొదటి ఇంగ్లిష్ పుస్తకం "ఫైవ్ పాయింట్ సమ్ వన్". 2004 లో పబ్లిష్ అయిన ఈ నవలే 2009 లో "త్రీ ఇడియట్స్" బ్లాక్‌బస్టర్ సినిమాగా హిందీలో సెన్సేషన్ క్రియేట్ చేసింది.  

"ఫైవ్ పాయింట్ సమ్ వన్" నవల రాయడానికి ఆ రచయితకు సుమారు మూడు నాలుగు ఏళ్లు పట్టింది. హాంకాంగ్‌లోని తన ఆఫీసులో కూర్చుని కొంత, ఇంటికొచ్చాక ఫ్రీటైమ్‌లో కొంత.. వీలున్నప్పుడల్లా, రాయాలనిపించినప్పుడల్లా.. చాలా.. ఆరామ్‌గా.. రాసిన నవల అది.

అది అతని తొలి నవల. ఎలాంటి డెడ్‌లైన్స్ లేవు అప్పుడు.

కట్ చేస్తే - 

ఒకే ఒక్క సంవత్సరం తర్వాత, 2005 లోనే, తన తన రెండో నవల "వన్ నైట్ @ కాల్ సెంటర్" రాశాడా రచయిత.

మళ్లీ ఎందుకో ఓ మూడేళ్ల గ్యాప్. బహుశా ఉద్యోగమా, రచనా అన్న సంఘర్షణ అయ్యుంటుంది.

2008 లో "ది త్రీ మిస్టేక్స్ ఆఫ్ మై లైఫ్", 2009 లో "2 స్టేట్స్", 2011 లో "రెవల్యూషన్ 2020", 2012 లో "వాట్ యంఘ్ ఇండియా వాంట్స్" (ఇది నాన్ ఫిక్షన్) చక చకా రాసేయాల్సిన డిమాండ్ ఆ రచయితకు క్రియేట్ అయింది.

ఇప్పుడు, వచ్చే అక్టోబర్ 1 న, ఇదే రచయిత సరికొత్త నవల "హాఫ్ గాళ్‌ఫ్రెండ్" రిలీజ్ అవబోతోంది. కనీసం ఓ
5 మిలియన్ల కాపీలయినా ఈ పుస్తకం సేల్స్ ఉంటాయని "రూపా" పబ్లిషర్స్ అంచనా.

మరోవైపు, అక్టోబర్ 1 నాటికి, దేశవ్యాప్తంగా ఈ పుస్తకాన్ని ఆయా గమ్యాలకు చేర్చడం కోసం "ఫ్లిప్‌కార్ట్" అప్పుడే వేలాది కార్టన్ బాక్సులు, ట్రక్కుల లెక్కల్లో యమ బిజీగా ఉంది.

కట్ టూ సినిమా కిక్ - 

తన తొలి నవల ఫైవ్ పాయింట్ సమ్ వన్ (త్రీ ఇడియట్స్) ఒక్కటే కాదు.. ఆ తర్వాత కూడా ఇదే రచయిత రాసిన వన్ నైట్ @ కాల్ సెంటర్ "హలో" గానూ, ది త్రీ మిస్టేక్స్ ఆఫ్ మై లైఫ్ "కాయ్ పొ చే" గానూ, "2 స్టేట్స్" అదే పేరుతోనూ హిందీలో సినిమాలుగా రూపొందటం నిజంగా గొప్ప విషయం.        

ఇలా ఉంటే - ఇటీవలి సాల్మన్ ఖాన్ "కిక్" సినిమాకి స్క్రీన్‌ప్లేని కూడా అందించిన ఈ రచయిత .. ఎప్పుడైనా లైఫ్‌లో కిక్ కావాలనిపించినప్పుడు ఫిలిం డైరెక్షన్ కూడా చేస్తానంటున్నాడు.

టైమ్ మేగజైన్ "వరల్‌డ్స్ 100 మోస్ట్ ఇన్‌ఫ్లుఎన్షియల్ పీపుల్ 2010" లిస్టులోకి కూడా ఎక్కిన ఈ రచయిత పంజాబ్ లోని ఓ మధ్యతరగతి కుటుంబంలో పుట్టి, డిల్లీ లో పెరిగాడు. ఐ ఐ టి లో మెకానికల్ ఇంజినీరింగ్ చదివాక, ఐ ఐ ఎం లో మేనేజ్‌మెంట్ కూడా చదివాడు. (అక్కడే తన క్లాస్‌మేట్, తమిళ అమ్మాయి, అనూషని ప్రేమించి పెళ్లి చేసుకున్నాడీ రచయిత. ఆ కథని కూడా ఓ నవలగా రాయొచ్చు. అది వేరే విషయం.)

ఆ తర్వాతే ఇన్వెస్ట్‌మెంట్ బ్యాంకర్‌గా హాంగ్‌కాంగ్ లో పనిచేశాడు. ఆ సమయంలోనే అప్పుడప్పుడూ ఏదో రాస్తూ, చివరికి రాయడమే సీరియస్‌గా తీసుకుని 30 ఏళ్లకే బెస్ట్‌సెల్లర్ రచయితయ్యాడు.

క్యాండీ క్రష్, వాట్సాప్ లాంటివి తప్ప నాకు మరే రచయితా కాంపిటీషన్ అని నేను ఫీలవడంలేదు అని చాలా సింపుల్‌గా చెప్పే ఈ 40 ఏళ్ల రచయిత ఎవరో మీకు తెలుసు.

ఇక ఫ్లిప్‌కార్ట్ ద్వారా, ఓ నెలతర్వాత, నా చేతుల్లో వాలబోతున్న ఈ రచయిత "హాఫ్ గాళ్‌ఫ్రెండ్" ఎలా ఉంటుందో నాకు బాగా తెలుసు.

ఇదంతా ఎలా ఉన్నా .. సక్సెస్ సైన్స్‌కు సంబంధించిన ఒకే ఒక్క అంశం ఈ సాయంత్రం నేనీ బ్లాగ్ పోస్ట్ రాయడానికి కారణమైంది.  అదేంటంటే.. సరిగ్గా 9 ఏళ్లక్రితం ఎలాగయినా ఇండియా టుడే కవర్ పేజీకి ఎక్కాలని ఈ రచయిత కలగన్నాడు. ఇప్పుడు ఎక్కేశాడు.

దటీజ్ చేతన్ భగత్.     

అసలేందీ సింగపూర్, కె సి ఆర్?

"ప్రపంచంలోని 193 దేశాల్లో ఈ సింగపూర్ ఒక్కటే దొరికిందా వీళ్లిద్దరికీ?" అనుకుంటూ నా లిస్ట్ లోంచి సింగపూర్‌ని కొట్టేశాను. ఇంచుమించు ఇదే అర్థంలో సరదాగా ఓ ట్వీట్ కూడా పెట్టాను ఈ ఉదయమే.

కానీ, ఇప్పుడు ఈ బ్లాగ్‌లో రాస్తున్నది మాత్రం సరదాగా కాదు.

సుమారు రెండు దశాబ్దాలనుంచీ ఈ సింగపూర్ జపం వింటూనే ఉన్నాం మనం. చంద్రబాబు నాయుడు పుణ్యమా అని వివిధకోణాల్లో సింగపూరూ, ఆయన పేరూ దాదాపు పర్యాయపదాలయిపోయాయి.

రాష్ట్రాన్ని సింగపూర్‌లా చేస్తానని పదే పదే అనడం ఒక కోణం కాగా, ఆయనకు సింగపూర్లో ఓ పెద్ద హోటల్, బోల్డన్ని ఆస్తులున్నాయని ఆరోపణలుండటం ఇంకో కోణం. నిజానిజాల విషయం పక్కనపెడితే - ఇవన్నీ వినీ వినీ సింగపూర్ అంటేనే ఒక రకమైన విరక్తి ఏర్పడింది. నా ఒక్కడికే కాదు .. చాలా మందికి!


కట్ టూ కె సి ఆర్ సింగపూర్ విజిట్ -  

ఇంతకు ముందెన్నడూ విదేశీయానం చేయని కె సి ఆర్ కు, సి ఎం గా తొలి విదేశీ పర్యటన సింగపూర్ కావటం కేవలం యాదృచ్చికం. సింగపూర్‌లోని ఐ ఐ ఎం "అలుమ్ని" నుంచి అలా ఆహ్వానం రావడం, ఇలా ఓకే అని వెళ్లడం చకచకా జరిగిపోయాయి.

పనిలో పనిగా పక్కనే ఉన్న మలేషియా కూడా ఒక రౌండ్ వేసి వచ్చారు కె సి ఆర్.

అయితే, అందరూ అనుకుంటున్నట్టుగా - ఏదో సింగపూర్ అనగానే చంకలు గుద్దుకుంటూ ఫ్లైట్ ఎక్కలేదు కె సి ఆర్.

సింగపూర్ తొలి ప్రధాని లీ క్వాన్ యూ రాసిన "సింగపూర్ ఫ్రమ్ థర్డ్ వర్‌ల్డ్ టూ ఫస్ట్" పుస్తకాన్ని సుమారు 20 ఏళ్లక్రితమే చదివారు కె సి ఆర్. మామూలు నిరుపేద మూడో ప్రపంచదేశం స్థాయి నుంచి, ప్రపంచంలో ప్రథమశ్రేణి దేశంగా ఆ దేశం ఎలా ఎదిగిందో ఒక స్పష్టమైన అవగాహన ఉంది ఆయనకు. ఈ నేపథ్యంలోనే, బహుశా, సింగపూర్ విజిట్‌కు వెంటనే ఓకే చెప్పి చెప్పుంటారు కె సి ఆర్.  

అది 1993 అనుకుంటాను. అప్పుడు నేను ఆలిండియా రేడియోలో పనిచేస్తున్నాను ..

18 ఏళ్ల ఒక అమెరికన్ టీనేజర్ స్టూడెంట్ సింగపూర్‌లో చేసిన ఓ చిన్న నేరానికి అతన్ని జైల్లో పెట్టారు. ఆ కుర్రాడు చేసిన నేరం ఏంటంటే - దొంగతనంగా ఓ నాలుగయిదు కార్లకి రెడ్‌కలర్ పెయింట్‌ను స్ప్రే చేయడం!  

ఆ అమెరికన్ కుర్రాడి పేరు పీటర్ ఫే.

పీటర్ చేసిన నేరానికి సింగపూర్ ప్రభుత్వం ఆ దేశ చట్టాల ప్రకారం 4 నెలల జైలు, సుమారు 2 వేల డాలర్ల జరిమానా, ఓ 6 బెత్తం దెబ్బల శిక్ష విధించింది.

1993-94 ల్లో ప్రపంచమంతా ఈ సంఘటనపైనే కొన్ని రోజులపాటు హెడ్‌లైన్సూ, బ్రేకింగ్ న్యూస్‌లు! అమెరికా ఈగో తట్టుకోలేకపోయింది. "ఇది చాలా అతి" గా అభివర్ణించింది అమెరికా.

చివరికి అప్పటి ప్రెసిడెంట్ బిల్ క్లింటన్ సింగపూర్ గవర్నమెంటుకు ఒక లేఖ రాస్తూ, ఆ బెత్తం దెబ్బలయినా మినహాలించాలని కోరాడు. క్లింటన్ కోరికను మన్నించి, సింగపూర్ ప్రభుత్వం పీటర్ ఫే శిక్షను 6 బెత్తం దెబ్బల నుంచి 4 బెత్తం దెబ్బలకు తగ్గించింది! జైలు శిక్ష, జరిమానా మాత్రం యథాతథం!!

దటీజ్ సింగపూర్!

అమెరికా అయినా, అంగోలా అయినా సింగపూర్‌కు ఒక్కటే. వారి చట్టాలు మారవు. అవి ఎవరికీ చుట్టం కావు. అంత క్రమశిక్షణ, చిత్తశుధ్ధి ఉన్నాయి కాబట్టే .. వైశాల్యంలో ఎంతో చిన్న దేశమయినా 'పర్ క్యాపిటా'లో ప్రపంచంలో నంబర్ వన్ స్థానాన్ని కూడా చేరుకోగలిగింది.

తన తొలి విదేశీ పర్యటనలోనే సింగపూర్‌ని అధ్యయనం చేసే అవకాశం కె సి ఆర్ కు రావడం కాకతాళీయమే అయినా ఒక రకంగా సందర్భోచితం. తెలంగాణ తొలి సి ఎం గా, తెలంగాణ పునర్నిర్మాణానికి పూనుకున్న ఈ దశలో సింగపూర్‌ను ఒక మోడల్‌గా తీసుకొని, ప్రణాలికల్ని వేసుకొని పనిచేయడం, చేయించడం కె సి ఆర్ కు తప్పక ఉపయోగపడుతుంది.

కనీసం త్రాగు నీరు కూడా దొరకని సింగపూర్‌లో, మిగిలిన వనరుల లభ్యత కూడా అతి స్వల్పం. ఒక్కోదానికి ప్రపంచంలోని ఒక్కో దేశంపైన ఆధారపడిన దేశం సింగపూర్. కేవలం 276 చదరపు కిలోమీటర్ల వైశాల్యం ఉన్న ఈ దేశ జనాభా 54 లక్షలు మాత్రమే. అయినా - ఒక స్పష్టమైన విజన్‌తో, డెడ్‌లైన్‌లతో కూడిన లక్ష్యాలతో ఎంతో వేగంగా అభివృధ్ధి చెందింది సింగపూర్.

మరి వైశాల్యంలోనూ, జనాభాలోనూ, వనరుల్లోనూ ఎన్నోరెట్లు అధికంగా ఉన్న మన దేశంలో ఈ అభివృధ్ధి ఎందుకు సాధ్యం కాలేదు?

కనీసం ఇప్పుడు మన తెలంగాణలో ఈ అభివృధ్ధి ఎందుకు సాధ్యం కాదు?

చేస్తే అవుతుంది. అయితీరుతుంది.

మనకంటే 18 ఏళ్లు ఆలస్యంగా, 1965 లో స్వాతంత్ర్యం సంపాదించుకున్న సింగపూర్ తొలి ప్రధాని లీ క్వాన్ యూ చేసిన కృషికి ఫలితం, ప్రతిరూపం ఇప్పటి సింగపూర్.

తెలంగాణ తొలి సిఎం కె సి ఆర్ ఇప్పుడలాంటి బాధ్యతను, ఛాలెంజ్‌ను స్వీకరించడానికి సిధ్ధమయ్యారు. సాక్షాత్తూ ఇప్పటి ప్రధాని లీ సీన్ లూంగ్ తోనే తన మంత్రులకు, ఎమ్మెల్లేలకు, ఎమ్‌పీలకు, అధికారులకు శిక్షణ ఇప్పించడానికి పూనుకున్నారు కె సి ఆర్.

సింగపూర్ ఐ ఐ ఎం అలుమ్ని కార్యక్రమంలో సిఎం కె సి ఆర్ చేసిన ఒకే ఒక్క ప్రసంగంతో, అప్పటికప్పుడు 3 అంతర్జాతీయ కంపెనీలు తమ మెగా ప్రాజెక్టులతో ముందుకు వచ్చాయి. వందలాది ఇతర కంపెనీలు సంప్రదింపులు జరుపుతున్నాయి. వాటిల్లో కనీసం 10 శాతం సక్సెస్ అయినా అది కె సి ఆర్ కు గొప్ప విజయమే!

ఉద్యమం అయిపోయింది .. తెలంగాణ వచ్చింది.. అని ఊరుకోకుండా, అదే ఉద్యమ స్పూర్తితో తెలంగాణ పునర్నిర్మాణం విషయంలోనూ తెలంగాణ ప్రజలంతా కృషి చేయాల్సిన అవసరం ఉంది.

ఊరికే విజన్ అంటూ దశాబ్దాలు మాటలతోనే వృధా చేయకుండా - అవసరమయితే తెలంగాణ పునర్నిర్మాణాన్ని కూడా ఒక ఉద్యమంలా మలచగల శక్తియుక్తులు దళపతి కె సి ఆర్ కున్నాయి. ఆయన అలా తప్పక చేస్తారని ఆశిద్దాం.

చేస్తారు కూడా!