4058 రోజుల ఆత్మీయ స్నేహం!

జీవితంలో ఒక దశ తర్వాత చెయ్యాలనుకున్నది చేసేసుకుంటూ పోవడమే. 

మిగిలిందంతా జస్ట్ బుల్‌షిట్! 

కట్ చేస్తే -   

సినిమా ప్యాషనేట్స్ అయిన కొంతమంది లైక్‌మైండెడ్ మిత్రుల నెట్‌వర్క్‌ను సృష్టించుకొనే ప్రయత్నంలో భాగంగానే ముందు నేనీ బ్లాగ్‌ను సృష్టించాను. 

ఊరికే సినిమా టిడ్‌బిట్స్, రొటీన్ వార్తల్లాంటివి రాయకుండా... నా అనుభవంలో నాకు తెలిసిన ఫిలిం ఇండస్ట్రీ లోపలి విషయాలను లైటర్‌వీన్‌లో, హిపోక్రసీ లేకుండా రాస్తూ పంచుకోవాలన్నది నా ఆలోచన. 

అందుకే, ఈ బ్లాగ్‌కు "నగ్నచిత్రం" అని పేరు పెట్టాను.  

దీన్ని కొంచెం సీరియస్‌గా, కొంచెం ఈజీగా, కొంచెం కేర్‌లెస్‌గా తీసుకొంటూ... ఎప్పుడో తోచినప్పుడు మాత్రం... "ఏదో రాయాలి కాబట్టి రాస్తాను" అన్నట్టుగా అలా రాస్తూపోయాను. 

నెమ్మదిగా బ్లాగింగ్ ఎంత శక్తివంతమైందో నాకర్థమైంది. నా దినచర్యలో ఒక విడదీయరాని భాగమైంది. 

తర్వాత్తర్వాత, నా ఫ్రీలాన్సింగ్ క్రియేటివ్ యాక్టివిటీ మొత్తానికి దీన్నే ఒక "హబ్‌"లా ఉపయోగించుకొంటూ, ఏ ఒక్కదానికీ పరిమితం చేయకుండా అన్నీ దీన్లోనే రాయడం ప్రారంభించాను. 

అందరూ, అన్నీ... ఇక్కడే... నా ఈ బ్లాగింగ్ ప్లాట్‌ఫామ్ మీదే నాకు కనెక్ట్ కావడం ప్రారంభమైంది.   

21 ఆగస్టు 2012 నాడు, నేను అనుకోకుండా సృష్టించిన ఈ "నగ్నచిత్రం" వయస్సు చూస్తుండగానే 11 ఏళ్ళు దాటింది.

ఇవాళ్టికి సరిగ్గా 4058 రోజుల ఆత్మీయ స్నేహం మా ఇద్దరిదీ! 

ఎందరో అద్భుతమైన మిత్రులు నాకు ఇక్కడే పరిచయమయ్యారు. నా జీవితంలో ఎన్నో ముఖ్యమైన మలుపులకు, ఆలోచనలకు ఈ బ్లాగే కారణమయ్యింది. 

నా లేటెస్ట్ బెస్ట్ సెల్లర్ పుస్తకం "కేసీఆర్ - ది ఆర్ట్ ఆఫ్ పాలిటిక్స్" ఆలోచన నాలో రావడానికి కూడా నాకత్యంత ఇష్టమైన నా ఈ బ్లాగింగ్ అలవాటే కారణం.     

కట్ చేస్తే - 

చాలా గ్యాప్ తర్వాత మళ్ళీ నేను వరుసగా ఓ రెండు మూడు సినిమాలు చెయ్యాలనుకొని సీరియస్‌గా పూనుకోడానికి కూడా ఈ బ్లాగే కారణం.  

గురువుగారు దాసరి నారాయణరావు గారిని గుర్తుకు తెచ్చుకొంటూ అప్పట్లో నేను రాసిన ఒక బ్లాగ్ పోస్టును అనుకోకుండా ఆమధ్య చదివిన తర్వాతే నాకీ ఆలోచన వచ్చింది.  

నవంబర్ దాకా నా కొత్త సినిమా ప్రి-ప్రొడక్షన్ పనుల్లో బిజీగా ఉంటాను కాబట్టి, బ్లాగ్‌ను కొద్దిరోజులు మర్చిపోదామనుకొన్నాను. ఆల్రెడీ నెల దాటింది నేనీ వైపు చూడక! 

కాని, ఏదో కోల్పోయినట్టుగా ఉంది. 

నాకెంతో ఇష్టమైన బ్లాగింగ్ కోసం ఒక 15, 20 నిమిషాలు వెచ్చించలేనంత బిజీగా మాత్రం ఏం లేను అన్న విషయం నాకు బాగా తెలుసు. 

మరింకేంటి?  

సో, హియర్ అయామ్. 

బ్యాక్ టు బ్లాగింగ్. 

"Sometimes I think of blogging as finger exercises for a violinist; sometimes I think of it as mulching a garden. It is incredibly useful and helpful to my “real” writing." 

~Kate Christensen