తెలుగు ఫిలిం జర్నలిజంలో అసలేం జరుగుతోంది?

దయచేసి ముందు ఈ లింక్ ఓపెన్ చేసి చూడండి:

https://youtu.be/W-2jUnmY22Q?si=3UdQ1J3Sno9lIFem 

కట్ చేస్తే - 

మొత్తం ఆమే చెబుతోంది... సోకాల్డ్ మహిళా-జర్నలిస్టు:

> తెలుగు అమ్మాయిలు ఇండస్ట్రీలోకి రావడానికి భయపడతారట. దానికి ఫస్ట్ రీజన్ "కాస్టింగ్ కౌచ్"ట. 

(ఈవిడకు ఎలా తెలుసు?)   

> చెప్పినా చెప్పకపోయినా అది వాస్తవం ట. 

(ఈమే డిసైడ్ చేసేస్తోంది!)  

> ఫిలిం ఫీల్డులో ఒక హీరోయిన్‌కు, ఆర్టిస్టుకి చాన్స్ ఇచ్చేటప్పుడు ఫస్ట్ కమిట్మెంటే అడుగుతారట. 

(అంత ష్యూర్‌గా ఈమెకెలా తెలుసు? పూర్వాశ్రమంలో నటిగా తనకు అలాంటి అనుభవాలున్నాయా?) 

> సైన్ చేసే అగ్రిమెంట్‌లో కూడా కమిట్మెంట్ అని ఉంటుందట. 

(అలాంటి ఒక్క అగ్రిమెంట్ చూపించమనండి. ఇండస్ట్రీ పెద్దలు ఈ విషయం చాలా సీరియస్‌గా తీసుకోవాలి.)

> కమిట్మెంట్ ఇస్తే ఒక "రేటు" అట, ఇవ్వకపోతే ఒక రేటు అట. 

(అసలా భాష ఏంటి, ఒక బాధ్యతాయుతమైన జర్నలిస్టు భాషేనా అది? ఈమె ఎక్కడనుంచి వచ్చింది, ఎక్కడి భాష?)   

ఒక సినిమా ప్రమోషన్ కార్యక్రమంలో ఒక హీరోయిన్‌ను పట్టుకొని, జుగుప్సాకరమైన భాషలో, ఇలాంటి పనికిమాలిన ప్రశ్నలు అడగటమేనా ఫిలిం జర్నలిజం? 

ఆమధ్య ఒక హీరోయిన్‌ను "ఒక్క విషయం చెప్పండి... మీరు డైవోర్స్ తీసుకున్నారా లేదా?" అని హింసించాడొక సో కాల్డ్ జర్నలిస్టు. ఇంగిత జ్ఞానం ఉన్న ప్రశ్నేనా అది? 

థియేటర్ దగ్గర పెద్ద కటౌట్ పెట్టుకున్నాడని, ఒక కొత్త హీరోని పట్టుకుని, "అసలు నీకు అంత కటౌట్ అవసరమా?" అని అడిగాడింకో జర్నలిస్టు. ఇదే ప్రశ్నను అల్లు అర్జున్ తొలి సినిమా ప్రెస్ మీట్ అప్పుడు అడిగాడా సదరు జర్నలిస్టు?    

తెలుగు ఫిలిం జర్నలిజంలో అంతకు ముందు ఇలా లేదు. ఈమధ్యే ఎక్కువైపోయింది. చిన్న సినిమాలవాళ్ళను, చిన్న స్థాయి హీరోయిన్స్‌ను, హీరోలను ఆడుకుంటున్నారు. ఇలాంటి కొశ్చన్సే పెద్ద హీరోలు, డైరెక్టర్లు, నిర్మాతలు కూర్చున్న (పెద్ద సినిమాల) ప్రమోషన్ ప్రెస్ మీట్స్‌లో అడిగే దమ్ముందా ఇదే జర్నలిస్టులకి? 

ప్రభు, వినాయకరావు, బాల్‌రెడ్డి, ధీరజ్ అప్పాజీ, ఓంప్రకాశ్ నారాయణ్ వంటి సీనియర్ ఫిలిం జర్నలిస్టు మిత్రులెందరో నాకు వ్యక్తిగతంగా తెలుసు. వారి స్థాయి వేరు. వారి నోటి నుంచి నేనెప్పుడూ ఇలాంటి భాష, ఇలాంటి ప్రశ్నలు వినలేదు. 

పైన చెప్పిన ఉదాహరణల్లో లాంటి జర్నలిస్టుల వల్ల మొత్తం తెలుగు ఫిలిం జర్నలిజానికే చెడ్డ పేరొస్తోంది. పక్కనే కూర్చొని ఇలాంటి చెత్తను మౌనంగా ఎంజాయ్ చేస్తున్న సీనియర్ జర్నలిస్టు మిత్రులు ఈ విషయం గురించి కొంచెం ఆలోచించాల్సిందిగా నా హంబుల్ రిక్వెస్టు. 

నిజంగా... ఇక ఫిలిం ప్రెస్ మీట్స్ అన్నీ... ఇలాగే... ఇంత చెత్త స్థాయిలోనే కొనసాగుతాయి అనుకుంటే... ఇలాంటి ప్రెస్ మీట్లు పెట్టకపోవడమే మంచిది. 

వీటివల్ల సినిమాలకు ఎలాంటి మేలు జరగదు. 

వాళ్లకిచ్చే డబ్బులు దండగ. మన విలువైన సమయం వృధా. అనవసరంగా మనసు పాడుచేసుకోవడమవుతుంది. 

సోషల్ మీడియా ప్రమోషన్ బాగా చేసుకుంటే చాలు. సినిమాలో ఏమాత్రం సత్తా ఉన్నా మౌత్ టాక్ కూడా దానికి సహకరిస్తుంది. మనం ఆశించే రిజల్ట్ అదే వస్తుంది. 

కట్ చేస్తే -

మొన్నొక మహిళా మంత్రి మీడియా ముందు మాట్లాడిన మాటల కంటే, ఈ మహిళా జర్నలిస్టు మాట్లాడిన మాటలు, వేసిన ప్రశ్నలు ఏం తక్కువ కాదు. చెప్పాలంటే ఇంకా ఎక్కువే.

ఇంత చెత్తను నవ్వుతూ భరించి, గట్టిగా మొహం మీద గుద్దినట్టు జవాబిచ్చిన అనన్య నాగళ్ళకు అభినందనలు. హాట్సాఫ్. 

- మనోహర్ చిమ్మని