సినిమావల్ల కేవలం ప్రొడ్యూసర్, డైరెక్టర్లకేనా లాభం?

"ఇంతకుముందులా సిన్సియర్‌గా ఎవ్వరు లేరు సర్" అని మా నాగ్ అన్నప్పుడు నేను ఆశ్చర్యపోయాను. 

నిజమే కావచ్చు.  

కాని, అది మనకున్న ఎక్స్‌పీరియన్స్ మీద, మనం పనిచేసిన వాతావరణం, మనం చూసిన టీమ్స్, అక్కడి వ్యవస్థల మీద ఆధారపడి ఉంటుంది. 

90 శాతం అలాగే, మా నాగ్ చెప్పినట్టే, ఉండొచ్చు, నమ్ముతాను. కాని, ఒక్క 10 శాతం అయినా పనిచేసేవాళ్ళుంటారు.

ఈ 10 శాతం మంది కూడా వారి ప్రొఫెషన్‌ను ఒక తపస్సులా భావించి పనిచేసినప్పుడే ఆ 1% క్లబ్ లోకి వెళ్ళగలుగుతారు.   

నాకు ఆ 10 శాతం వ్యక్తులంటేనే గౌరవం. అలాంటివాళ్లతో కలిసి పనిచెయ్యడానికి నేనెప్పుడూ ఇష్టపడతాను. 

దురదృష్టవశాత్తు - చాలామందికి - ఈ సినీఫీల్డు నేపథ్యం ఇచ్చే కిక్, పాపులారిటీ, ఫేమ్, సెలెబ్రిటీ హోదా, డబ్బు, సోషల్ మీడియా స్టేటస్‌ల కోసం ఫోటోలు, వీడియో బైట్స్, కాంటాక్ట్స్ లాంటివి కావాలి తప్ప - సినిమా కోసం ఇప్పుడు ఫీల్డులో ఉన్న సెలబ్రిటీలంతా ఎంత కష్టపడతారన్నది అవసరం లేదు. 

వాళ్ళెంత కష్టపడాలన్నదాని మీద కూడా వాళ్ల బుర్రలో అసలు ఎలాంటి స్పష్టత ఉండదు.     

అయితే - "ఎవరి ఫోకస్ ఎక్కడ, ఎంత" అన్న విషయంలో మాత్రం మనకు  మాత్రం ముందే క్లారిటీ ఉండాలి. అది లేకుండా ఓవర్ కాన్‌ఫిడెన్స్‌తో క్రియేట్ చేసుకొనే టీమ్ వల్ల ఎన్నో ఇబ్బందులు పడాల్సి వస్తుంది. 

కట్ చేస్తే -   

మనకున్న రిసోర్సెస్‌లో, ఒక సినిమా బాగా చేసుకొని, ఒక మంచి బజ్ క్రియేట్ చేసుకున్నా, బిజినెస్ చేసుకున్నా, హిట్ కొట్టినా... అది డైరెక్టర్ ఒక్కడికో, ప్రొడ్యూసర్ ఒక్కడికో వచ్చే లాభం కాదు. 

టీమ్‌లో అందరికీ ప్రత్యక్షంగా, పరోక్షంగా ఆ విజయం ఎంతగానో ఉపయోగపడుతుంది. 

ఫలానా హిట్ సినిమాలో నేను ఏడీగా చేశాను, నేను ఎడిటర్‌గా చేశాను... అని ఒక టెస్టిమోనియల్‌గా చెప్పుకోవచ్చు. సొంతంగా ప్రాజెక్ట్స్ సాధించుకోవచ్చు. 

నేనైతే - నాకొచ్చే షేర్‌లో కొంత శాతం నా టీమ్‌కు ఇస్తాను అని కూడా బాహాటంగానే మా టీమ్ మీటింగ్స్‌లో ఎన్నోసార్లు చెప్పాను. 

ఎందుకంటే - నేను "మన సినిమా" అని అనుకుంటాను కాబట్టి... అలా అనుకునే నా గురించి, వాళ్ళు కూడా వాళ్ళ సొంత సినిమాలా భావించి ప్రాజెక్టు కోసం కష్టపడతారని... అలా కష్టపడ్డందుకు నాకు చేతనైనంతలో నేను కూడా వాళ్లకు అన్నివిధాలా సపోర్ట్ ఇవ్వాలన్నది నా ఆలోచన. 

Every frame should whisper, scream, or seduce—cinema is emotion set ablaze. Cinema is a battleground. 

- మనోహర్ చిమ్మని