మనం రోబోల్లా బ్రతుకుతున్నామా?

కొన్ని క్షణాలు అన్నీ మర్చిపోండి..

ఇంట్లోనో, ఆఫీస్‌లోనో.. మీకు నచ్చిన ఏ మూలనో ప్రశాంతంగా కూర్చోండి. ఆలోచించండి. ఒక అయిదు నిమిషాలు చాలు.

మనలో చాలామంది జీవితాల్లో అసలు ఏం జరుగుతోందో ఇట్టే తెలిసిపోతుంది..

మన జీవితం మన ఇష్టానుసారంగా నడుస్తోంది అనుకుంటాం. శుధ్ధ అబధ్ధం. జీవితంలో ప్రతి ఒక్కటీ మన చాయిస్‌తోనే జరుగుతోంది అనుకుంటాం. ఇది మరీ ఆత్మవంచన.

వాస్తవం ఏంటంటే - మనం "రోబో"ల్లా బ్రతుకుతున్నాం. మన జీవితంలో ప్రతిక్షణం, ప్రతి చర్య, ప్రతి దశ యాంత్రికం. చిన్నతనం నుంచీ మనం పెరిగిన వాతావరణం, మనం ఎదుర్కొన్న సమస్యలు, మనం చూసిన సంఘటనలు.. ఇవన్నీ ఎప్పటికప్పుడు మన మెదడులో కొన్ని ఫైల్స్‌ని సృష్టిస్తాయి.

మనం ఏ పని చేసినా, ఏం ఆలోచించినా అదంతా ఆ ఫైల్స్‌లోని ప్రోగ్రామింగ్ ప్రకారమే చేస్తాం తప్ప, మరో విధంగా కాదు.      

ఉదాహరణకు.. జేబులో ఓ వంద కాగితం ఉన్నప్పుడు పదిమంది ప్రవర్తన పది రకాలుగా ఉంటుంది:

ఒకరు ఆ వంద రూపాయల్ని సేవింగ్స్‌లో జమ చేయాలనుకుంటారు. మరొకరు ఆ వందలో యాభై జల్సా చేసి, మరో యాభైని ఇంట్లో వాళ్లావిడకు ఇవ్వాలనుకుంటారు. ఇంకొకరు ఆ వందకు తోడుగా ఇంకో యాభై అప్పు చేసి ఫుల్లుగా మందుకొట్టవచ్చు.

ఇవన్నీ నిజానికి వారి ఇష్టప్రకారం, ఛాయిస్ ప్రకారం జరిగే పనులు కావు. వారి మెదడులో జరిగిన ప్రోగ్రామింగ్ ప్రకారం, ఆ ప్రోగ్రామింగ్ కారణంగా ఏర్పడి స్థిరపడిపోయిన పాత అలవాట్ల ప్రకారం జరిగే పనులు.


కట్ టూ అసలు విషయం - 

పైన చెప్పినదంతా "సైకో సైబర్నటిక్స్". ఒక సైన్స్. ఈ సైన్స్ సృష్టికర్త మాక్స్‌వెల్ మాల్ట్. ఈనాటి అన్ని పర్సనల్ డెవెలప్‌మెంట్ పుస్తకాలు, ప్రోగ్రాములు, శిక్షణ.. వీటన్నింటికీ మూలం ఈ సైకో సైబర్నటిక్స్ అంటే అతిశయోక్తి కాదు. నిజం.

ఆ నిజం ఏంటో, ఎంతవరకు నిజమో.. తర్వాతి బ్లాగ్ పోస్టుల్లో ఎప్పుడయినా చర్చిద్దాం.